Вечерва Скопје ја добива тринаесеттата дезинсекција против комарци за оваа сезона. До крајот на сезоната се планирани повеќе од дваесет. Тринаесет извршени, дваесет најавени – а на Клиниката за инфективни болести лежат пациенти со западнонилска треска.

Според објавени податоци, годинава во Скопје се потврдени 35 пациенти заболени од западнонилска треска. Шестмина се во критична состојба. Тројца починале.

Што вели градот

Градоначалникот Орце Ѓорѓиевски објаснува дека активностите се спроведуваат според Годишната програма, законските обврски и Елаборатот изготвен од Центарот за јавно здравје – Скопје, одобрен од надлежните здравствени власти. Дезинсекциите се вршат „континуирано, навремено и по однапред утврдена динамика”.

Распоредот навистина е густ. На 20 август теренска дезинсекција против возрасни форми, на 21 август во раните утрински часови авионска дезинсекција, а од 23 до 26 август терестична дезинсекција. Досега во сезоната се реализирани шест ларвицидни третмани – три авионски и три теренски – плус повеќе третмани против возрасни комарци.

Ниту еден од овие броеви не е спорен. Спорно е што стои до нив.

Бројката што недостасува во соопштенијата

Кога една програма се спроведува по план, навремено и во целост, а сепак на инфективна има критично болни луѓе и починати, тоа не значи автоматски дека некој не си ја работел работата. Може да значи дека планот не е доволен. Може да значи дека третманот е насочен погрешно, или доцни во однос на циклусот на комарецот, или дека проблемот воопшто не се решава со прскање туку со ситните езерца стоечка вода што никој не ги брои.

Проблемот е што за ниту една од тие можности нема јавна анализа. Има список на извршени третмани и список на закажани. Ефикасност не се мери со број на прскања. Се мери со број на заболени – и токму таа бројка расте паралелно со дезинсекциите.

Што им останува на луѓето

Лекарите информираат дека најголемиот дел од хоспитализираните имаат симптоми што го зафаќаат централниот нервен систем, како менингитис и енцефалитис, што е вообичаена компликација кај постарите лица и кај луѓето со хронични болести. Апелот до граѓаните е да носат долга облека и да користат репеленти при престој на отворено во вечерните часови.

Значи, заштитата на крајот се сведува на долги ракави и спреј од аптека, купен од сопствен џеб. Градот прска, човекот се мачка.

Пчеларите повторно се повикани навреме да ги преземат мерките за заштита на пчелните семејства. Тоа е единствената група која добива конкретно предупредување со точен час.