Војната што со години се водеше главно на украинска почва, оваа ноќ уште еднаш стигна до срцето на Русија. Над 400 украински дронови летаа кон Москва и Московскиот регион, погодувајќи објекти, повредувајќи цивили и предизвикувајќи масовни евакуации од логистички центри.

Градоначалникот на Москва, Сергеј Собјанин, соопшти дека нападот траел од 20:30 до 5 часот наутро. Според него, поголемиот дел од дроновите биле пресретнати на далечните приоди кон градот, додека 85 биле уништени додека се приближувале до Москва. „Од 20:30 до 5 часот, над 400 непријателски дронови летаа кон Москва. Противвоздушната одбрана ги неутрализираше повеќето на далечни приоди. 85 дронови беа уништени близу Москва”, изјави тој.

Шест лица со повреди од експлозии со различна тежина се примени во болницата во Домодедово. Последиците се документирани во населбата Ново Домодедово, додека голем логистички центар во Подолск претрпе штета. Работниците беа масовно евакуирани додека одекнуваа експлозии во околината. Воздушниот сообраќај беше времено нарушен, со ограничувања на аеродромите Внуково, Домодедово и Жуковски.

Меѓу погодените е и голем централен логистички објект на компанијата „Вајлдберис” во Коледино во Московскиот регион. Снимките покажаа евакуација на вработени од магацинскиот комплекс, со чад што се крева над зоната на удар. Овој напад доаѓа само два дена откако дронови погодија центри на „Вајлдберис” во Електростал и Котовск, предизвикувајќи пожари и прекини во испораките.

Бројката од над 400 дронови го прави овој напад меѓу најголемите обиди за удар врз руската престолнина и нејзината околина од почетокот на конфликтот. Тоа е и симболично: логистиката, магацините, синџирите на снабдување – целите повеќе не се само воени бази, туку самиот мотор на секојдневната економија.

Војната што почна со фронтови и ровови сè повеќе се води со беспилотни летала што летаат стотици километри и удираат таму каде што порано изгледаше безбедно. Кога дроновите можат да стигнат до магацин крај Москва, ниедна линија на картата веќе не е сигурна граница. А тоа е поука што не се однесува само на Русија и Украина – тоа е новото лице на војната, и вреди добро да се запамети.