Во СОУ „Јосиф Јосифовски“ во Гевгелија годинава во прва година се запишаа 166 ученици. Пред две години беа 218. Тоа се 52 ученици помалку – речиси една четвртина – за само две учебни години.

Трендот не е права линија, туку планина. Во учебната 2021/2022 година во прва година биле запишани 176 ученици, следната година 174, потоа 204, а во 2024/2025 врвот од 218. Оттогаш – надолу: 186 лани, 166 годинава. Основното образование годинава во Гевгелија го завршиле 173 деветтоодделенци, што значи дека дел од нив средното образование го продолжиле на друго место.

Најтешко е кај стручните профили. За готвач/келнер се запишале четворица ученици, а за автомеханичар шестмина. Општината побарала од Министерството за образование и наука да дозволи паралелки со помал број ученици – три гимназиски, со помалку од 24 ученици, и две тригодишни стручни. Министерството се согласило за гимназиските, но не и за стручните. Десетмината ученици заинтересирани за тие струки на крајот се запишале во машинската струка.

Мала гимназиска паралелка – може. Мала паралелка за готвачи и автомеханичари – не може. Ако земјава има вишок готвачи, келнери и автомеханичари, тоа е логична одлука. Ако нема – кој ја направил оваа пресметка и врз основа на што?

Општината предупредувала дека без бараните паралелки училиштето ќе се соочи со намалување на фондот на часови за поголем број наставници, а во иднина и со технолошки вишок. Советникот Борче Нечевски од ЗНАМ на седница на Советот на Општина Гевгелија предложи стручните профили да се заштитат, односно лиценцираат, за да можат како готвачи и келнери да работат само луѓе со соодветно образование – и така да се зголеми интересот за овие струки.

Дел од младите заминуваат во други општини и поголеми градови, по профили што Гевгелија не ги нуди. Кога еден град ќе престане да нуди струки, младите не чекаат – одат таму каде што ги има. Прашањето е дали потоа ќе се вратат.