Над 4.000 заболени граѓани во Гостивар. Загадена вода во уште седум населени места и во две реки. Хиперхлорирање што ги уби фекалните бактерии, но роди нови. И политичка расправа во која двете страни се согласни само околу едно: виновникот е онаа другата.

Премиерот Христијан Мицкоски објасни зошто водата во Гостивар сè уште не е за пиење: „Со хиперхлорирањето се појавија нови бактерии во самите инсталации. Очекувам овој предизвик да биде надминат и, откако ќе биде надминат, очекувам таа вода да биде одобрена за пиење и користење.“

Истиот ден, потоа, го врати ударот кон опозицијата: „Имаме преку 400 пријави за неквалитетна вода во Гостивар. Ништо не е преземено, нула.“ Мисли на периодот кога Венко Филипче беше министер за здравство. Никола Мицевски од ВМРО-ДПМНЕ ја дополни истата линија – околу 400 анализи покажале дека граѓаните во некои градови пиеле небезбедна вода, а јавноста никогаш не била информирана.

Барањето на опозицијата

СДСМ бара не само политичка, туку и кривична одговорност. Портпаролката Богданка Кузеска именуваше: министерот за здравство Сашо Клековски, директорката на Државниот санитарен и здравствен инспекторат, директорите на надлежните центри за јавно здравје и сите службени лица кои, како што рече, знаеле што се случува, ги криеле информациите и не презеле мерки.

„Прво, институциите признаа дека ‘црвените светла’ им се запалиле предоцна. Додека илјадници гостиварци пиеја загадена со фекалии, никој не презел ништо“, рече Кузеска.

Го постави и прашањето што е најтешко да се одбегне: „Кој институт ги изработил анализите? Кој го потпишал извештајот? Врз основа на кои параметри е утврдено дека е безбедна?“ Јавноста, според неа, сè уште нема добиено официјален потпишан извештај за анализите на техничката вода.

Двете страни зборуваат за различни години

Ова е класична македонска расправа. Едната страна прашува кој одговара за 2026 година. Другата одговара со 2021 година. Двете тврдења можат да бидат точни истовремено – и токму затоа ниту едно не е одговор.

Ако навистина постојат над 400 непроцесуирани пријави за неквалитетна вода од претходниот мандат, тоа е предмет за обвинителство, не реплика на прес-конференција. Ако институциите оваа година реагирале предоцна и не ја информирале јавноста навреме, тоа е исто така предмет за обвинителство. Мицкоски токму тоа го побара – обвинителството да ги истражи старите пријави и надлежните институции.

Клековски соопшти дека во изминатите 24 часа се регистрирани 71 нов случај, што укажува на смирување на епидемијата. Тоа е бројката што вреди да се следи. Сè друго засега е распределба на вина за нешто што веќе се случи на 4.000 луѓе.