Сите службени возила на Град Скопје и на јавните претпријатија се опремени со GPS-уреди и се следат преку мониторинг центар во реално време. Се гледа каде е возилото, по која маршрута се движи, со која брзина, колку време е во движење и колкава е потрошувачката на гориво. Дополнително, преку специјални сонди се контролира и нивото на гориво во резервоарот.

Градоначалникот Орце Ѓорѓиевски го формулираше правилото во една реченица: секое возило, секој километар и секој литар гориво мора да има оправдување.

Половина милион евра на гориво, за шест месеци

Најконкретниот податок што го изнесе е за ЈСП. Претпријатието во првите шест месеци од годинава бележи заштеда од половина милион евра за гориво во споредба со истиот период лани – и тоа со дополнително вклучени 50 возила во системот.

Тоа е делот што ја носи целата приказна. Повеќе возила, помалку потрошено гориво. Ако бројката е точна – а таа доаѓа од самиот град и заслужува проверка од Советот, не аплауз – тогаш разликата не била во технологијата. Разликата била во тоа што претходно никој не гледал.

Прашањето што само по себе се поставува

Сондата за гориво не е скапа технологија. GPS-уредот во возило не е иновација од 2026 година. Ниту едното ниту другото не бараат нов закон, ни европски фондови, ни студија за изводливост.

Значи прашањето не е како е воведено сега. Прашањето е зошто половина милион евра годишно течело без никој да забележи, и уште поточно – колку години течело.

Ѓорѓиевски посочува и дека не користи службено возило, туку доаѓа со сопствен автомобил и горивото го плаќа сам, а возилото што го користеле претходните градоначалници е ставено на располагање на градот. Тоа е симболика и функционира како симболика.

Бројката, пак, не е симболика. Половина милион евра се улици, се паркови, се училишни клупи. Ѓорѓиевски вели дека токму таму треба да завршат заштедените средства.

Дотогаш, единственото што граѓанинот може да го провери е дали следната година ќе има втор извештај со втора бројка – или заштедата ќе остане една објава од август 2026 година.