Ямајканските реге легенди Инер Сиркл за прв пат настапуваат во Бугарија, на 28 јули во Маимунарника во Софија. Бендот познат како „The Bad Boys of Reggae” доаѓа во рамките на својата светска турнеја Stay Strong Jamrock, со вечер насловена по нивниот најголем хит – „Sweat A La La La Long”.

Инер Сиркл е формиран во Кингстон уште во 1968 година и спаѓа меѓу најзаслужните имиња за глобалната популаризација на регето. По раната ера со пејачот Џејкоб Милер, која заврши со неговата смрт во сообраќајна несреќа во 1980, бендот се реформира во 1986 и во деведесеттите доживеа светски пробив. Песната „Sweat (A La La La La Long)” стигна до трето место на британската листа и до врвот во десет земји, продавајќи над милион примероци во Европа, додека „Bad Boys” стана препознатлива по тоа што ја отвора американската телевизиска серија COPS.

За албумот „Bad Boys” бендот доби и Греми во 1993 година во категоријата за најдобар реге албум, што ги потврди како едно од најуспешните реге имиња во историјата. Нивните концерти се познати по позитивната енергија и по хитовите кои и денес се пуштаат ширум светот, така што појавувањето во Софија е ретка прилика да се чујат живо песни кои обележаа цела една генерација.

Концертот се одржува во Маимунарника во Борисовата градина, а билетите се продаваат преку bilet.bg, со цени во еврска противвредност од околу 20 до 30 евра. За љубителите на регето од Македонија, првото појавување на Инер Сиркл во соседна Бугарија е доволна причина за летен излет до Софија.