Виолинистката Ирина Муресану го затвора шестдневниот престој на ФЕЈМС Институтот со концертот „За љубовта“ на 16 септември во Музејот на современата уметност во Скопје. Програмата е составена околу една тема низ четворица композитори од различни епохи, што е поризичен избор од вообичаениот хронолошки распоред затоа што бара делата да издржат споредба меѓу себе.

Муресану е родена во Романија и има настапи низ САД, Канада, Европа, Азија и Јужна Африка. Дипломирала на Букурешката академија во 1994 година, потоа продолжила во САД на Универзитетот во Илиноис и во Њу Ингланд конзерваториумот, каде студирала кај легендарната француска виолинистка Мишел Оклер и се стекнала со докторат по музички уметности. Лауреат е и добитничка на највисоки награди на неколку меѓународни натпревари, меѓу кои Монтреал, Кралица Елизабета и УНИСА. Денес е професорка на Универзитетот во Мериленд, а предавала и на Харвард и на МИТ. Свири на виолина изработена од Џузепе Рока во 1849 година.

Вечерта ја отвора Романсата на Ејми Бич, американска композиторка чија музика долго беше на маргините на репертоарот. Следи „Echorus“ на Филип Глас за две соло виолини, потоа виртуозната фантазија „Кармен“ на Пабло де Сарасате инспирирана од операта на Бизе, а програмата ја заокружува „Преобразена ноќ“ на Арнолд Шенберг, напишана според песна на Рихард Демел. Тоа е распон од доцен романтизам преку шпанска виртуозност до раниот Шенберг, кој сеуште пишува тонално но веќе гледа во друга насока.

Концертот е завршен настан на програмата во чии рамки млади класични музичари од цела Европа престојуваа во Скопје и работеа со Муресану преку интензивни проби и работа по групи. Почнува во 21 часот на 16 септември, билетот чини 500 денари преку mktickets.mk. За тие пари, виолинистка со ваква биографија обично не се слуша во просторија со стотина луѓе.