Шведскиот крал Карло Густав го прослави својот 80. роденден на 30 април со гала вечера во Кралскиот дворец во Стокхолм. Кралици, кралеви и големи војводи од половина свет седнаа на иста маса – и менито беше повеќе политичка изјава отколку гастрономска понуда.

На челната маса, лево и десно од јубилерот, седеа кралицата Соња Норвешка и кралицата Мери Данска. До нив, кралот Харалд Норвешки и кралот Филип Белгиски. На таа маса не се служеше само јадење – се служеше распоред. Кој стои до кого, кој е до кралот Карло Густав, кој е сместен подалеку – ова се пораки што се читаат подобро од дипломатските соопштенија.

Менито со три јадења беше класична шведска презентација. Прво: јастог со копар, артичока и винегрет од истиот морски плод. Второ: филе од шведско телешко со див лук и жалфија, терина од задушено телешко со смрчки, прилози од пролетни зеленчуци, крокети од компир со бадеми и зрело сирење. Трето: динстен раведен со мус од лимон и зова, печени бадеми и сорбе од раведен.

Декорот раскажуваше уште една приказна. Кристалот, дизајниран од Сигурд Персон, беше свадбен подарок на шведскиот парламент кон кралот и кралицата Силвија во 1976. Чиниите за главното јадење потекнуваат од керамика правена во Берлин во 1850-та за мајката на кралицата Викторија. Чиниите за десерт беа изработени по нарачка на престолонаследникот Карло XV – првиот монарх на династијата Бернадоте роден во Шведска.

Подметачите од позлатено сребро со кралскиот грб се направени од Стафхел во почетокот на 19 век. Чаршафот и салфетите се ткаени во 1891-та во Лил, Франција, со везен шведско-норвешки грб во центарот. Прибор за јадење од бронза, купен од Карло XIV Јуан во Париз пред повеќе од два века.

На една маса се собрани повеќе векови европска монархија и неколку илјади евра вредност во наследни предмети – и сето тоа за прослава на еден роденден. Шведските даночни обврзници веројатно нема да добијат сметка во раце, бидејќи Кралскиот дом во голема мера се финансира од приватни и фондациски средства. Но прашањето на Балканот секогаш е истото: кога владата кај нас прослави нешто, кој ја плаќа сметката, и кој вечера јастог?