Парите наменети за развој на руралните средини повторно завршиле како мета на измама. Управата за финансиска полиција поднесе кривични пријави против пет физички лица и две компании поради сомнение дека со лажна документација се обиделе да измолзат над 50 милиони денари (околу 815.000 евра) од европската програма ИПАРД.

Механизмот, според пријавите, бил едноставен колку и дрзок. Двајца надзорни инженери наводно извршиле технички прегледи на недовршени објекти и издале лажни извештаи дека се завршени. Со таа документација компаниите потоа ги впишале незавршените градби во Катастар, иако тие не ги исполнувале законските услови за употреба.

Обвинувањата вклучуваат злоупотреба на службена положба, фалсификување деловни документи, измама со средства од ЕУ и употреба на лажни документи. Точната сума што сакале да ја наплатат изнесува 50.141.528 денари. Случаите се препратени до Основното јавно обвинителство за организиран криминал и до скопското обвинителство.

Шемата е позната до здодевност: државата дава пари за развој, некој наоѓа начин да ги извлече без да изгради ништо, а на крајот сметката ја плаќаат сите што чесно чекаат во ред. Финансиската полиција овој пат реагираше – но прашањето е колку вакви „недовршени објекти” поминале незабележано пред некој да го забележи трикот. ИПАРД треба да гради села, не нечии лажни хартии.