Владимир Путин прогласи нова фаза на војната – безбедносната зона во Украина ќе се шири сè додека не се елиминира заканата за руските гранични региони. Преведено: нема крај додека Москва не одлучи дека е доволно. А кога Москва одлучува за границите, историјата покажува дека доволно никогаш не е доволно.

Рускиот претседател зборуваше пред локални претставници и беше директен: до 2030 година, Донбас и Новорусија мора да достигнат „општо руско ниво на клучни индикатори.” Сите државни органи треба да работат кон таа цел. Значи, Москва веќе не зборува за „специјална воена операција” – зборува за интеграција на окупирани територии како дел од руската држава.

„Знаеме како ќе заврши специјалната воена операција и ќе ги исполниме сите зацртани задачи,” порача Путин. Формулацијата е позната – истата реторика ја слушавме и пред три години. Но зоната на контрола постепено расте, а „задачите” никогаш не се конкретно дефинирани.

За Европа, ова е јасен сигнал дека Русија не планира повлекување. За Украина, ова е продолжение на кошмарот. А за Балканот? Кога голема сила ги менува границите со сила и зборува за „безбедносни зони” без краен рок – тоа не е далечна приказна. Тоа е сценарио кое овој регион го живеел на своја кожа.