САД повлекуваат дел од дипломатите од Саудиска Арабија, кај Хормуз одекнуваат експлозии: Заливот повторно се тресе

Стејт департментот нареди дел од дипломатскиот персонал и нивните семејства да ја напуштат Саудиска Арабија. Четворица американски функционери потврдија дека слични мерки се подготвуваат и за семејствата на дипломатите во другите заливски држави. Портпаролот Томи Пигот ја потврди одлуката за Саудиска Арабија и појасни дека се однесува на вработените што не се задолжени за итни работи и на членовите на нивните семејства. Причината: сè пожестоките напади на јеменските хути, кои ги поддржува Иран.

Тежината на одлуката е во времето. Изминатите месеци Вашингтон постепено ги враќаше луѓето во мисиите од кои ги евакуираше по почетокот на американско-израелската војна против Иран кон крајот на февруари. Сега процесот оди наназад. Тоа само по себе не значи дека е одлучено за нова американска воена операција – но кога дипломатите се пакуваат, ретко е поради добри вести.

Додека Вашингтон ги брои своите луѓе, иранската државна агенција ИРНА извести за неколку експлозии во покраината Хормозган на југот на Иран, во областа Карпан, во околината на градот Сирик, на брегот на Оманскиот залив и близу до влезот во Хормузскиот теснец. Што ги предизвикало, дали има жртви и дали се поврзани со американската одлука – засега никој не кажува. На социјалните мрежи кружат снимки со тврдења дека станува збор за американски воздушен удар врз ирански лансер на противбродски ракети, но тоа официјално никој не го потврди.

Во меѓувреме, хутите ја гаѓаат Саудиска Арабија. Последните недели на нишан им беа цивилни аеродроми и друга клучна инфраструктура, со загинати и повредени. Меѓународниот аеродром „Крал Халид“ во Ријад, кој во октомври повеќепати беше цел, е затворен од 10 октомври и дури сега делумно ги обнови домашните летови, а Lufthansa и Air France ги откажаа летовите до средината на ноември. Делови од пресретнат дрон паднаа врз нафтеното поле Шајба, со кое управува Aramco – загинаа двајца работници од Непал и Филипини, а уште двајца, од Пакистан и Индија, се повредени.

Во самиот Јемен е уште полошо. Во ракетен напад на хутите врз камп на јеменските владини сили во покраината Шабва загинаа најмалку 73 лица, повеќе од 200 се ранети, а 14 се водат како исчезнати. Примирјето од 2022 година, кое со години ги држеше големите судири под капак, оваа година се распадна. Борбите повторно стигнаа до теснецот Баб ел-Мандеб, низ кој минува поморскиот сообраќај меѓу Црвеното море и Аденскиот залив.

Хормуз и Баб ел-Мандеб – двете морски врати низ кои минува огромен дел од нафтата и стоката на светот – повторно се во зоната на огнот. Осум месеци по првите американско-израелски удари врз Иран, војната не завршува, само ја менува формата. Колку пати Балканот има слушнато дека некоја војна е „при крај“?