Речиси една деценија Републиканците имаа едно нешто што им беше неприкосновено – економијата. Прашај американски избирач кој подобро води економија и одговорот беше предвидлив низ целиот прв мандат на Трамп, низ целото претседателство на Бајден, и на почетокот на овој мандат. Сега таа предност исчезна. Според истражување на Ipsos, 37 отсто од регистрираните избирачи мислат дека Демократите имаат подобар пристап кон економијата, наспрема 36 отсто за Републиканците. Останатите 27 отсто не се одлучиле или бираат некој трет.

Еден процентен поен разлика не е земјотрес. Но кога тој поен е првиот по речиси десет години, тогаш не е поенот важен – важен е трендот што го носи.

35 отсто

Поддршката за Доналд Трамп падна на 35 отсто – два поени помалку од претходното истражување минатиот месец, и само еден поен над најниската точка на неговиот сегашен мандат. Истражувањето опфати 4.505 возрасни Американци, со маргина на грешка од два поени.

Причината која се спомнува најгласно е онаа која се гледа на секоја пумпа. По американско-израелските удари врз Иран во февруари и војната што следеше, цените на горивото скокнаа. Од почетокот на војната бензинот е поскап за над 25 отсто – Американецот на пумпа сега плаќа повеќе од еден долар по галон над она што плаќаше пред конфликтот.

Трамп тврди дека ударите ги наредил за да ја уништи иранската нуклеарна програма, да ја ограничи можноста Техеран да напаѓа регионални противници и да создаде услови за соборување на иранските религиозни власти. Дали тоа се случило – е една дискусија. Она што се случило на пумпите е друга, и се чини дека избирачите ја водат втората.

Изборите за Конгрес

Ако изборите за Конгрес се одржеа сега, 42 отсто од регистрираните избирачи би гласале за демократски кандидат, наспрема 37 отсто за републикански. Меѓу независните избирачи предноста на Демократите е дури 12 поени. Републиканците на 3 ноември ќе бранат тесни мнозинства во двете комори.

Тука вреди да се биде претпазлив, и тоа е нешто што ретко се чита во насловите: националните истражувања не кажуваат многу за поединечните натпревари. Од 435 места во Домот на претставниците, само околу триесет се очекува да бидат навистина неизвесни, а околу осум сенатски натпревари се отворени. Значи цела оваа математика на крај ќе се реши во неколку десетици окрузи.

Одговорот на Трамп

Трамп рутински ги отфрла истражувањата што покажуваат незадоволство. „Моите ВИСТИНСКИ бројки од истражувањата, а не оние измислени од лажните медиуми, се најдобри досега”, напиша тој на Truth Social, во понеделник, пред објавата на најновото истражување.

Реакцијата е позната сцена секому кој следи политика на овие простори. Кога бројката не е добра, проблемот е во оној кој мери. Разликата е само во тоа што во САД мерачите се приватни агенции со објавена методологија и маргина на грешка, па тврдењето лесно се проверува. Прашањето кое останува е дали тоа воопшто има значење за оној кој веќе одлучил на кого да верува.