Gati një dekadë republikanët kishin një gjë që u ishte e paprekshme - ekonominë. Pyet një votues amerikan kush e udhëheq më mirë ekonominë dhe përgjigjja ishte e parashikueshme gjatë gjithë mandatit të parë të Trumpit, gjatë gjithë presidencës së Bajdenit, dhe në fillim të këtij mandati. Tani ajo epërsi u zhduk. Sipas një hulumtimi të Ipsos, 37 për qind e votuesve të regjistruar mendojnë se demokratët kanë qasje më të mirë ndaj ekonomisë, përballë 36 për qind për republikanët. 27 për qind e mbetur nuk janë vendosur ose zgjedhin dikë të tretë.

Një pikë përqindjeje dallim nuk është tërmet. Por kur ajo pikë është e para pas gati dhjetë vjetësh, atëherë nuk është pika e rëndësishme - i rëndësishëm është trendi që e sjell.

35 për qind

Mbështetja për Donald Trumpin ra në 35 për qind - dy pikë më pak se hulumtimi i muajit të kaluar, dhe vetëm një pikë mbi pikën më të ulët të mandatit të tij aktual. Hulumtimi përfshiu 4.505 amerikanë të rritur, me marzh gabimi prej dy pikësh.

Arsyeja që përmendet më zëshëm është ajo që shihet në çdo pikë karburanti. Pas goditjeve amerikano-izraelite mbi Iranin në shkurt dhe luftës që pasoi, çmimet e karburantit u hodhën lart. Që nga fillimi i luftës benzina është mbi 25 për qind më e shtrenjtë - amerikani te pompa tani paguan mbi një dollar për galon më shumë se sa paguante para konfliktit.

Trumpi pretendon se i urdhëroi goditjet për ta shkatërruar programin bërthamor iranian, për ta kufizuar mundësinë e Teheranit të sulmojë kundërshtarë rajonalë dhe për të krijuar kushte për rrëzimin e autoriteteve fetare iraniane. A ndodhi kjo - është një diskutim. Ajo që ndodhi te pompat është tjetër, dhe duket se votuesit e zhvillojnë të dytin.

Zgjedhjet për Kongres

Nëse zgjedhjet për Kongres do të mbaheshin tani, 42 për qind e votuesve të regjistruar do të votonin për kandidat demokrat, përballë 37 për qind për republikan. Mes votuesve të pavarur epërsia e demokratëve është madje 12 pikë. Më 3 nëntor republikanët do të mbrojnë shumica të ngushta në të dyja dhomat.

Këtu ia vlen të jesh i kujdesshëm, dhe kjo është diçka që rrallë lexohet në tituj: hulumtimet kombëtare nuk thonë shumë për garat e veçanta. Nga 435 vende në Dhomën e Përfaqësuesve, pritet që vetëm rreth tridhjetë të jenë vërtet të pasigurta, ndërsa rreth tetë gara senatoriale janë të hapura. Pra e gjithë kjo matematikë në fund do të zgjidhet në disa dhjetëra qarqe.

Përgjigjja e Trumpit

Trumpi rutinë i hedh poshtë hulumtimet që tregojnë pakënaqësi. „Numrat e mi TË VËRTETË nga hulumtimet, e jo ata të trilluar nga mediat e rreme, janë më të mirët deri tani", shkroi ai në Truth Social, të hënën, para publikimit të hulumtimit më të ri.

Reagimi është skenë e njohur për këdo që ndjek politikën në këto anë. Kur shifra nuk është e mirë, problemi është te ai që mat. Dallimi është vetëm se në SHBA matësit janë agjenci private me metodologji të publikuar dhe marzh gabimi, kështu që pretendimi verifikohet lehtë. Pyetja që mbetet është nëse kjo fare ka rëndësi për atë që tashmë ka vendosur kujt t'i besojë.