Полицијата во Неготино уапси 50-годишен маж и неговата невенчана сопруга под сомнение за лихварство и физички напад врз должник.

Според информациите од МВР, С.Н. (50) од Неготино пред неколку месеци му позајмил 2.000 денари на сограѓанин, барајќи несразмерна камата. Откако должникот не успеал да ја врати сумата на време, С.Н. прифатил накит како гаранција.

На 9 октомври 2025 година, осомничените С.Н. и неговата сопруга Н.А. (35) отишле во домот на должникот и физички го нападнале. Според пријавата, нападната била и сопругата на оштетениот, која се обидела да го спречи инцидентот.

При претрес во домот на осомничените, полицијата пронашла пари во различни валути, накит, вага, куршуми без дозвола, туѓ пасош и нотес со белешки за долгови. При приведувањето, С.Н. физички нападнал и двајца полициски службеници.

Против Н.А. е поднесена кривична пријава за „насилство“, а против С.Н. за „насилство“, „лихварство“, „напад врз службено лице“ и „недозволено поседување оружје“.

Судија на претходна постапка му одреди мерка притвор на С.Н., додека неговата сопруга е задржана во полициска станица.