Од ВЛЕН упатија остри критики кон поранешниот министер за правда Билен Салији од ДУИ, обвинувајќи го дека за време на својот мандат не направил ниту чекор за да овозможи правосудниот испит да се полага и на албански јазик. Прашање што се влече со години, а ниту еден министер досега не го решил.

„Билен Салији треба да одговори зошто, додека беше министер за правда, правосудниот испит не се полагаше на албански јазик”, порачаа од ВЛЕН. Коалицијата потсети дека Министерството за правда со години го воделе кадри блиски до ДУИ – меѓу нив и Беџети, Јашари и Џафери – но институционално решение за овој проблем не дошло.

ВЛЕН се навраќа и на оставката на Салији, поднесена по случајот со детето Алмир, која тогаш беше претставена како морален чин. Од коалицијата сега тврдат дека и по таа оставка тој продолжил да држи јавни функции, иако зад себе немал конкретни резултати.

Зад политичката пресметка стои реален проблем што ги засега обичните луѓе – идните правници кои со години чекаат можност да го положат испитот на својот мајчин јазик. Прашањето е дали ВЛЕН, сега кога критикува, ќе го реши тоа што претходните го одложуваа, или и оваа критика ќе остане само уште една изјава во низата ветувања што се менуваат само по име, не по резултат.