Основното јавно обвинителство во Битола преку Канцеларијата за поврат на имот испрати итно барање до надлежните органи во Србија за замрзнување на имот поврзан со битолскиот бизнисмен Борче Марковски, кој се наоѓа во притвор поради злоупотреби во РЕК „Битола“.

Според Обвинителството, српските власти веќе издале наредби за замрзнување на 10 нови товарни и приклучни возила, набавени годинава од белградска компанија со која Марковски е поврзан. Истовремено, побарано е отворање на сеф во српска банка за кој постои сомнение дека е во негова сопственост.

Во Македонија, по барање на Обвинителството, се замрзнати и околу 30 милиони денари од сметките на Марковски и неговата фирма, како и повеќе недвижности: три стана во Скопје, парцела градежно земјиште, гаража, три товарни и едно патничко возило. Имотот е ставен под забрана за располагање, бидејќи постои сомнение дека потекнува од кривично дело и може да биде предмет на конфискација.

Истрагата што започна на 9 октомври опфаќа осум физички лица и едно правно лице – фирмата „Марковски компани“. Според обвинението, тие преку злоупотреба на јавни набавки во РЕК „Битола“ незаконито наплатиле над 1,7 милиони евра за работи кои не биле извршени.

Меѓу осомничените се и поранешниот директор на комбинатот Пеце Матевски и четворица раководители од ПЕ „Рудници“, кои се теретат за соизвршителство во кривични дела злоупотреба на службена положба и измама во службата. Тие, според Обвинителството, ѝ овозможиле на фирмата на Марковски да добие тендери како единствен понудувач и да наплати пари за непостоечки работи.

Со истрагата се утврдува обемот на прибавената противправна корист и нејзините траги во земјава и во странство, а обвинителството најавува нови мерки за обезбедување на средствата кои потекнуваат од кривичното дело.