Тирана ќе биде единствениот европски град во кој оваа година ќе настапи Кање Вест. Реперот, кој сега се претставува како Ye, доаѓа на стадионот Ер Албанија (Eagle Stadium) на 11 јули со почеток во 20 часот – концерт што албанскиот организатор го најавува како најголемиот музички настан во регионот за 2026 година.

Ye, односно Кање Вест, е едно од најконтроверзните и истовремено највлијателните имиња на современата музика. Со кариера долга над две децении, тој потпиша некои од најзначајните хип-хоп албуми воопшто – „The College Dropout”, „Graduation”, „My Beautiful Dark Twisted Fantasy”, „Yeezus” и „Donda” – плочи што обликуваа цели генерации звук, мода и поп-култура. Настапот во Тирана е најавен како негов прв во Албанија и на Балканот.

Околу концертот веќе има тензија, и тоа не само музичка. Премиерот Еди Рама лично го најави настанот како историски за главниот град, додека во исто време низа закажани настапи на Ye низ Европа – во Швајцарија, Полска и Франција – беа откажани, а неговото име беше повлечено и од британскиот фестивал Wireless поради повторените антисемитски и расистички изјави на артистот. Тирана останува, засега, единствената европска дестинација каде шоуто оди понатаму – што самата приказна ја прави поголема од обичен концерт.

Билетите се продаваат преку vivere.al и преку официјалната страница на настанот. Концертот се одржува на 11 јули на стадионот Ер Албанија во Тирана, во Албанија, со влез од 16 часот и почеток во 20 часот.