Кога американски претседател јавно им се заблагодарува на Путин и Си Џинпинг, а најостро се обрати на сопствениот сојузник – вреди да се запре и да се слушне. Доналд Трамп во интервју изјави дека Москва и Пекинг одиграле значајна улога во постигнувањето договор со Иран, признавајќи дека зделката не е извојувана само со американски притисок. Признание што во Вашингтон ретко се слуша наглас.

Но најжестоката порака Трамп ја упати не до Техеран, туку до израелскиот премиер Бенјамин Нетанјаху. „Тој е многу сложен човек и, искрено, треба да ни биде многу благодарен за ова. Зашто ако Иран имаше нуклеарно оружје, Израел немаше да постои за два часа”, рече Трамп – една од неговите најдиректни критики кон Нетанјаху од почетокот на кризата.

Јазолот е во Либан. Иранскиот Врховен совет за национална безбедност го потврди договорот, инсистирајќи дека војната мора трајно да престане на сите фронтови, вклучително и таму. Нетанјаху, пак, даде до знаење дека Израел ќе продолжи со воените операции против Хезболах и дека не се смета обврзан со условите на договорот. Со други зборови – договор постои на хартија, но едната страна веќе го става под прашање.

Потпишувањето на меморандумот е закажано за 19 јуни во Швајцарија. До тогаш, целиот свет ќе гледа дали зделката што ја склучија најголемите сили ќе ја сруши најмалиот, но најтврдоглав играч во равенката. Балканот ја знае оваа динамика: големите се договараат над глава, а оние што мислат дека немаат што да изгубат најчесто се тие што го рушат договорот. Прашањето е кој ќе плати цената ако и овој се распадне.