Долно Лисиче конечно добива нешто што одамна го бара – прва детска градинка. Општина Аеродром отпочна постапка за изградба, откако Советот со мнозинство ги одобри подготовките на потребната урбанистичка и проектна документација. За населба што со години расте побрзо од инфраструктурата, ова е чекор што недостигаше.

Проблемот на Долно Лисиче е познат – куќи и згради никнуваат, семејства со мали деца се доселуваат, а јавните објекти доцнат по неколку години. Родителите со години возат деца до градинки во други делови на градот, зашто во сопствената населба ништо нема. Донесениот детален урбанистички план сега отвора правна можност не само за градинка, туку и за спортска сала – инфраструктура што требаше да постои пред луѓето да се доселат, не после.

Според буџетот на општината за 2026, планирана е нова градинка „Пчелка 1″ во населбата. Ветувањата се убави – но Долно Лисиче не е населба што ѝ верува лесно на ветувања за објекти. Постапка отпочната не е градинка изградена. Помеѓу двете стои тендер, изведувач, рок, и историја на проекти што „почнале постапка” па застанале.

Ако градинката навистина се изгради, тоа ќе биде вест за радување – конечно место каде родителите од населбата ќе можат да остават дете без да поминат пола град. Но радоста доаѓа кога ќе се пресече лентата, не кога ќе се одобри документација. Дотогаш, Долно Лисиче со право ќе гледа со задршка – бидејќи ветена градинка нахранила многу претседателски мандати, а нахранила малку деца.