Четири дена. Толку помина од невремето што на 21 јули ја зафати Македонија, а на булеварот „Партизански одреди” во скопски Карпош лим од покрив сѐ уште виси закачен на дрвјата. Просторот на тротоарот е ограден со жолта лента, но сепак останува небезбеден за минувачите што секој ден поминуваат под него. Четири дена подоцна, опасноста сѐ уште е таму, каде што паднала.

Од Општина Карпош велат дека се една од најпогодените општини, со голем број материјални штети, и дека службите се на терен за расчистување. „Наш приоритет е безбедноста на граѓаните и што побрзо враќање на нормалното функционирање на јавниот простор”, порачуваат оттаму, заблагодарувајќи им се на карпошани за трпението. Трпение што, очигледно, се мери во денови.

Размерите на невремето не се мали и тоа не е изговор што треба да се отфрли лесно. Ветерот што дуваше во Скопје, Штип и Струмица тој ден имал јачина на оркан, потврди Управата за хидрометеоролошки работи. Преку итниот број 112 пристигнаа над 9.000 повици. Само во Скопје, до 22 часот, беа евидентирани 117 оштетени возила, 35 оштетени покриви, 189 паднати дрвја, седум семафори, пет пожари и 33 повредени лица.

Бројките објаснуваат зошто расчистувањето трае. Но не објаснуваат зошто едно парче лим сѐ уште виси над главите на минувачите четири дена подоцна. Жолтата лента не е решение – таа е признание дека проблемот е познат, а сепак нерешен. Кога следната бура ќе дојде, а на Балканот секогаш доаѓа, прашањето нема да биде колку брзо реагиравме, туку зошто едно опасно парче лим морало да чека толку долго за да падне или да биде симнато.