Воздухопловната команда на НАТО објави снимка од кабината на ловец Ф-18 над Романија. Ноќ, темнина, потоа блесок. Беспилотно летало кое нелегално влегло во романскиот воздушен простор било уништено од шпански воен авион Ф-18 кој извршувал мисија за воздушна полиција.

Шпански авион. Романско небо. Дрон кој не е ниту романски ниту шпански. Тоа е една реченица која кажува повеќе за состојбата на европската безбедност од кој било самит.

Романските власти потоа соопштија дека делови од дронот се пронајдени во Црното Море, на 1,5 километри од плажата во пристаништето Констанца. Екипа на романските поморски сили интервенирала за да ги прегледа остатоците. Воената проценка покажала дека дронот не носел експлозивен полнеж. Отпадот е предаден на Крајбрежната стража за понатамошна истрага.

Тоа што се повторува престанува да биде инцидент

Ова не е првиот пат. Соопштението самото наведува дека станува збор за уште еден во низа наоди на делови од дронови на романска територија во краток период. Кога нешто се случува еднаш, тоа е инцидент. Кога се повторува, тоа е состојба – а состојбата бара поинаков одговор од соопштение со снимка.

Романија е членка на НАТО и на ЕУ. Нејзиниот воздушен простор го чуваат сојузнички авиони. И покрај тоа, делови од беспилотни летала завршуваат километар и половина од плажа на која во август има луѓе. Дронот овој пат немал експлозив. Секој што ја чита реченицата „овој пат” знае што значи таа.

Растојанието од Констанца до нас не е големо ниту во километри ниту во логика. Балканот со децении ја живее истата динамика: она што се случува на работ на нечија граница ретко останува само таму. Дали Европа ќе реагира сега, или повторно ќе чека делот од дронот да падне на местото каде што има повеќе луѓе?