Антикорупциските истражители влегоа во Канцеларијата на претседателот на Украина. Не во некое министерство, не во општина – во Банкова, зградата од која се води државата.

Националното антикорупциско биро (НАБУ) и Специјализираното антикорупциско обвинителство (САП) започнале истражни дејствија во случај за голема криминална група поврзана со сегашни и поранешни пратеници. НАБУ е службата што ја истражува корупцијата на највисоко ниво, а САП ги води кривичните постапки во случаите што таа ги открива. Токму затоа нивното пристигнување на Банкова не е рутинска работа.

Според податоците од истрагата што стигнаа до јавноста, групата наводно ја воделе еден актуелен и еден поранешен пратеник на Врховната рада. Пратеникот Јарослав Железњак наведе дека еден од клучните луѓе е сегашен парламентарец, некогашен член на Опозициската платформа – За живот, кој поседува градежен бизнис.

Претрес кај заменичката на шефот на Канцеларијата

Истражителите веќе извршиле претрес кај Ирина Мудра, заменичка на шефот на Канцеларијата на претседателот. Истовремено се појавуваат информации дека се подготвува сомнеж против Давид Арахамија, шеф на пратеничката група на партијата „Слуга на народот”, и дека уште еден сомнеж би можел да биде подготвен против поранешниот шеф на Канцеларијата Андреј Јермак.

Дел од овие информации сè уште немаат официјална потврда од антикорупциските органи. Но ако се потврдат, истрагата би зафатила луѓе кои со години го чинат јадрото на власта околу Зеленски. Арахамија ја контролира клучната пратеничка група во Радата; Јермак со години беше меѓу најблиските и најмоќните соработници на претседателот.

А потоа доаѓа контраударот

Паралелно со акцијата се појавија тврдења дека врвот на украинскиот безбедносен апарат подготвува одговор против НАБУ и САП. Во тие наводи се спомнува Александар Поклад, кој моментално раководи со Службата за безбедност на Украина.

Ова не е прв пат. Кога антикорупциските истраги веќе еднаш се приближија до претседателското опкружување, беше покрената иницијатива за ограничување на нивната независност. Образецот е ист: институцијата истражува нагоре, а власта одеднаш открива дека таа институција има „проблем со мандатот”.

Дали некому на Балканот тоа му звучи познато? Тешко дека треба да се објаснува.

И барање за избори, од сопствените редови

Додека истражителите притискаат, Зеленски добива и политички проблем однатре. Поранешниот министер за одбрана Михаило Федоров објави обраќање во кое зборуваше за „системска криза во управувањето”, раширена корупција и потреба Украина да одржи избори дури и ако војната потрае. Тој смета дека државата мора да најде „легален, безбеден и реален механизам” за обновување на демократскиот процес.

Слично барање со месеци изнесува и поранешниот министер за надворешни работи Дмитриј Кулеба. Според наводите од Киев, Федоров добил поддршка и од дел од прозападните невладини организации и антикорупциските активисти кои претходно излегуваа во одбрана на НАБУ и САП.

Тоа значи дека околу претседателот се отвораат два фронта одеднаш – истрага што му приоѓа на најблиското опкружување и поранешни функционери кои сè поотворено бараат избори. Сè тоа додека трае војна, која досега беше најсилниот аргумент против секое прашање за тоа како се управува со државата.

Оттука се гледа нешто што нема да им се допадне на многумина: институцијата што ја истражува корупцијата ја врши својата работа токму кога тоа е најнезгодно. Прашањето е дали ќе ѝ дозволат да ја заврши.