Американската федерална судијка Сара Хил пресуди дека заменик-шериф во Талса, Оклахома, ги прекршил правата од Четвртиот амандман на една жена кога без налог ја пребарал нејзината регистарска таблица во базата на Flock Safety. Причина за пребарувањето, според судијката, немало – „освен фактот што [возилото на жената] имало калифорниски регистарски таблици“.

Заменик-шерифот потоа ја искористил историјата на нејзините патувања од Flock како дел од образложението за претрес на автомобилот, каде што наводно пронашол 91 фунта (околу 41 килограм) метамфетамин. Судијката пресуди дека сите докази собрани по пребарувањето во Flock „мора да бидат исфрлени како плод на отровно дрво“. Уставот не ја прашал количината на дрогата.

Хил не застана на еден случај. „Ова е вид неселективен масовен надзор“, напиша таа. „Не е насочен кон еден поединец. Тоа е алатка што собира информации за сите возила што минуваат покрај која било камера поврзана во мрежата, во секое време, и ги сервира на полицијата на барање.“ Следењето на луѓето, дури и на јавни места, според неа станува уставно проблематично кога полицијата може пасивно и без избор да ги евидентира нечии движења подолго време, а потоа тие податоци да ги користи за што сака и кога ѝ одговара.

Пресудата не создава обврзувачки преседан, но е една од првите во кои федерален судија вели дека претрага во Flock е неуставна. Стигнува во момент кога системот го критикуваат и левицата и десницата. Повеќе локални и државни власти, меѓу нив Флорида и Тексас, најавија дека ќе престанат да ја користат технологијата, а сенаторот Берни Сандерс во петокот предложи закон, Block Flock Act, со кој федералните агенции не би смееле да користат автоматски читачи на регистарски таблици.

Камерите што ги читаат таблиците не се само американска приказна. Прашањето што го отвори судијката од Оклахома важи насекаде: колку долго се чуваат податоците за тоа каде сме возеле и кој смее да ги пребарува без налог? Ако ваков систем се шири и кај нас, дали некој ќе го постави тоа прашање пред камерите да се монтираат?