Поранешен активист на СНС тврди дека партијата на Вучиќ плаќала по 200 евра дневно за луѓе во Ќациленд, а готовината ја носел од јавно претпријатие

Момчило Марјановиќ (54) повеќе од десет години бил активист на Српската напредна странка на Александар Вучиќ. Сега, во интервју за истражувачката новинарска мрежа БИРН, раскажува дека партијата организирала и плаќала групи силеџии, купувала гласови и инфилтрирала свои луѓе меѓу студентите и демонстрантите за да предизвикуваат судири со полицијата. Сето тоа се негови тврдења, а не судски утврдени факти – но се доволно детални за да не можат лесно да се турнат под тепих.

Тој вели дека лично водел групи мажи што ги чувале партиските простории, учествувале во пресметки со демонстранти и престојувале во таканаречениот Ќациленд – кампот на Вучиќевите приврзаници пред зградата на Претседателството на Србија. За престојот таму, тврди, добивал по 500 евра дневно, а мажите што ги водел по 200 евра. Парите ги примал во готово, во канцеларијата на директорот на едно новосадско јавно претпријатие.

Палки, спрејови и „стотина“ револвери

По падот на надстрешницата на новосадската железничка станица на 1 ноември 2024 година, во кој загинаа 16 луѓе и кој ги разгоре масовните протести, неговите задачи, вели, станувале сè понасилни. Пред големиот студентски протест на 15 март 2025 година во Белград поминал повеќе од две недели во Ќациленд. Во шаторите, раскажува, ги чекале палки, спрејови и фантомки. „Ако дојде до судир, да не бираме средства, имаме сè што ни треба. Да одиме до крај, без милост.“

„Додека шетав низ Ќациленд, видов доста луѓе со револвери што не ги ни криеја. Сигурно стотина“, тврди Марјановиќ. Додава дека полицијата соработувала со луѓето од кампот и дека слушнал полицаец како им кажува дека, ако полицијата не успее да ги задржи демонстрантите, ќе пушти одреден број од нив внатре – за групите во Ќациленд да ги претепаат и така да ги заплашат останатите.

Провокатори меѓу студентите

Најтешкото тврдење е за инфилтрацијата. „Организиравме момци од други градови, кои локалните луѓе не ги познаваат, да се вметнат во нивните редови. Тие потоа со камења и пиротехника ја напаѓаа полицијата, за да бидат обвинети студентите“, вели тој. Признава дека не сите судири биле режирани, но тврди дека лично учествувал во организирање провокации на протести во Белград, Бачка Паланка, Бачки Петровац и Нови Сад.

До 400.000 евра од градската топлана

Најконкретните обвинувања се упатени кон Ненад Барац, директор на јавното претпријатие „Новосадска топлана“ и член на СНС. Марјановиќ тврди дека Барац лично му давал упатства, го одобрувал бројот на ангажирани луѓе и ги исплаќал парите – во својата канцеларија, а кога директорот го немало, готовината го чекала кај секретарката. Проценува дека од падот на надстрешницата досега од тоа претпријатие подигнал меѓу 350.000 и 400.000 евра. Според новинарите, Марјановиќ им доставил и преписка со Барац како доказ. Барац одбил да одговори на прашањата, прашал од каде им се информациите и го прекинал разговорот.

Претпријатие што треба да ги грее новосадските станови, а од него – ако тврдењата се точни – излегувала готовина за луѓето во Ќациленд. Марјановиќ признава и дека со години примал плата во новосадското комунално претпријатие „Лисје“, без никогаш да се појави на работа. „Тоа се фантомски работни места, така ги викаат. Не сум единствениот, за жал“, вели. За купувањето гласови: „Обично беше 100 евра, а сега слушам дека даваат 400 или 500 евра за глас.“

Со партијата, вели, се скарал кога им помогнал на двајца студенти што влегле во Ќациленд и кога одбил да оди во Кула пред локалните избори на 29 март оваа година. Потоа почнале заканите. За нив ги обвинува поранешниот ММА-борец и активист на СНС Бојан Михајловиќ и неговиот соработник Владимир Зукиќ, а тврди дека Зукиќ се заканувал дека ќе му го повреди детето. Двајцата одбиле да одговорат на прашањата и негираат дека го познаваат.

Ова е сведоштво на човек што самиот признава дека учествувал – и дека уживал во привилегиите: „Никогаш не чекав ред кај лекар.“ Токму затоа тежи. Прашањето е дали некоја институција во Србија ќе го повика да го повтори тоа под заклетва, десетина дена пред изборите на 25 октомври – или Белград и понатаму ќе се занимава со броење хрватски написи за Вучиќ.