Обвинителката што ги најде парите во ѕидот на судијата Ристов го презема ОЈО ГОКК: победи со седум гласа повеќе од Пеливанов

Обвинителката која ги најде 350.000-те евра заѕидани во домот на родителите на судијата Ѓоко Ристов ќе го води Обвинителството за гонење организиран криминал и корупција. Искра Хаџи Василева ги доби непосредните избори на кои гласаа обвинителите од цела Македонија – со 64 гласа, седум повеќе од вишиот обвинител Трајче Пеливанов.

Јован Цветановски освои 30 гласа, Фатон Азизи 14, а Лидија Раичевиќ шест. Право на глас имаа 187 обвинители, неважечки беа четири ливчиња – сите на гласачкото место во Вишото јавно обвинителство Скопје. Хаџи Василева победи на сите гласачки места освен во Гостивар, каде Пеливанов ја надмина со 16 спрема 4. Во рок од седум дена Советот на јавни обвинители треба формално да ја именува, а таа ќе го наследи Ислам Абази, чиј мандат истекува во средината на ноември.

Изборот што не го прави партијата

Ова е еден од ретките избори во правосудството каде гласаат колегите, а не мнозинството во Собранието – за разлика од државниот обвинител, кој го избира владејачкото мнозинство. Тоа е добрата вест. Трката била тесна меѓу двајца обвинители со тешки предмети зад себе: Пеливанов ги водел предметите за прислушувањето и предмет против поранешниот директор на УБК Сашо Мијалков, а Хаџи Василева, покрај предметот за Ристов, го води и корупцискиот случај против поранешниот директор на Државниот инспекторат за земјоделство Васе Анакиев, со митото од 50.000 евра во гаража во Скопје.

Хаџи Василева е втората жена на чело на ова обвинителство, по Вилма Русковска, иако над 90 отсто од обвинителите во него се жени. На претставувањето на програмата порача дека фокусот мора да биде на корупцијата и организираниот криминал што го засегаат пошириот јавен интерес и го „оневозможуваат прогресот“.

Убави зборови, ама ОЈО ГОКК не се мери по програми. Работата на обвинителството во изминатиот период често беше на удар на критики, последно поради одлуката да ја запре истрагата за набавките на мазут за ТЕЦ Неготино. Дали новата шефица ќе ги отвори токму предметите што на властите им се најнепријатни – или ќе ја наследи и фиоката заедно со фотељата?