Ревизијата ја пофали кредитната линија од 250 милиони евра за бизнисот, но Министерството за финансии доцнело до 48 работни дена со парите

Државниот завод за ревизија ѝ даде позитивна оценка на Развојната банка за кредитната линија од 250 милиони евра за приватните компании – делот од унгарскиот кредит наменет за бизнисот. Банката, според ревизорите, постапувала во согласност со законите, интерните акти и договорите „во сите материјални аспекти“. Една забелешка сепак има, и таа не е за банката.

Министерството за финансии доцнело од 10 до 48 работни дена со исплатата на траншите, иако договорот бара парите да стигнат најдоцна за 10 работни дена. Доцнењето почнало кај четвртата транша, во мај 2025, и продолжило понатаму. Ревизорите предупредуваат дека тоа може да ја забави реализацијата на инвестициите на компаниите што ги чекаат парите. Државата значи нуди евтин кредит – а потоа самата го држи во фиока.

Каде отидоа парите

Одобрени се 767 проекти во вкупна вредност од околу 14,26 милијарди денари, приближно 232 милиони евра, преку 12 комерцијални банки. Условите се навистина поволни: фиксна камата од 1,95%, рок до 15 години, грејс-период до три години и до 10 милиони евра по корисник.

Малите фирми имаат најмногу проекти, 455 или 59%, но добиле само околу четвртина од парите, 3,57 милијарди денари. Големите компании со 94 проекти добиле 4,72 милијарди, а средните со 171 проект 4,61 милијарди. Најмногу пари, 44% или 6,29 милијарди денари, отишле во производство, а потоа во трговија, транспорт, градежништво и угостителство.

Позитивна ревизија не е позитивен ефект

Ревизијата кажува дека постапката била по правила. Не кажува колку нови работни места донеле овие пари. А податоците за пазарот на трудот за вториот квартал од 2026 не изгледаат воодушевувачки: вработеноста пораснала само 1% на годишно ниво, додека бројот на неформално вработени скокнал на 101.022 – практично секој седми работник во земјата работи на црно.

Над 230 милиони евра евтини пари за бизнисот, а сивата економија расте. Ако тоа не е прашање за Владата, што е? Следниот извештај што вреди да се чека не е за усогласеноста на банката, туку за тоа колку од 767-те проекти донеле договор за вработување наместо плик на рака.