Божиновска: Производството на струја е стабилно, за горивата чекајте до понеделник, за субвенции за гас „ќе дискутираме“

„Производството на струја е стабилно. ЕСМ се грижи за сигурно снабдување на граѓаните.“ Со овие реченици министерката за енергетика Сања Божиновска се обиде да ги смири домаќинствата пред зимата, на отворањето на саемот „Енерго Технома 2026“. За горивата, пак, одговорот беше – почекајте до понеделник.

Тогаш Регулаторната комисија за енергетика треба да ги објави новите цени на бензинот и дизелот. Божиновска објасни дека пресметките што ги доставуваат компаниите не значат автоматски толкаво поскапување, бидејќи конечниот збор го има регулаторот: „Да ја почекаме одлуката на Регулаторна, да видиме на крај каква ќе биде нејзината одлука и колку ќе има поскапување, ако има.“ Попустот на ОКТА важи до следната недела, а што потоа – ќе се анализира.

Бројката со која се фали Владата

Главниот аргумент на министерката е цената на струјата што ја продава државниот ЕСМ: 65 евра за мегават-час, наспроти над 135 евра кога, како што рече, актуелната Влада ја презела функцијата. „Повеќе од двојно поефтино ја продаваме струјата“, рече таа, нарекувајќи го тоа свесна отстапка заради граѓаните. Се пофали и со намалените акцизи и ДДВ, како и со попустите на ОКТА од по два-три денари – „тоа се милиони евра“.

Кај гасот сликата е помалку цврста. ЕСМ има обезбедено количини за ноември и води преговори за подолгорочно снабдување по пониски цени, а за субвенции, вели министерката, „секако дека ќе дискутираме“ – откако ќе се проценат финансиските импликации. Гасоводот кон Грција, 68 километри, треба да биде завршен околу јуни следната година, а изборите во Србија, според неа, нема да влијаат врз гасните проекти.

Од целото обраќање, единствената цврста бројка е цената по која ЕСМ ја продава струјата. За она што всушност го прашува секое семејство – колку ќе плаќа оваа зима за греење и за резервоарот – одговорот засега е „почекајте“.