Македонија ја надминува просечната застапеност на жени во националните парламенти во земјите членки на Европската Унија, покажуваат најновите податоци на Евростат. Во 2025 година, жените зазеле 37,5 отсто од пратеничките места во Собранието на Македонија, наспроти просекот на ЕУ од 33,6 отсто.

Во споредба со 2015 година, застапеноста на жените во националните парламенти во ЕУ пораснала за 5,4 процентни поени, додека во Македонија порастот изнесувал 3,4 процентни поени.

Меѓу земјите со највисока застапеност се Финска (46 отсто), Шведска (44,8 отсто) и Данска (44,7 отсто). На зачелото се наоѓаат Кипар (14,3 отсто), Унгарија (15,6 отсто) и Романија (22 отсто). Латвија бележи најголем пораст во периодот — 19 процентни поени, додека Германија е единствената земја каде застапеноста опаднала — за 3,5 поени.

Помалку оптимистична е сликата на ниво на влади: жените во македонската влада учествуваат со само 12,5 отсто, иако тоа претставува зголемување за 2,5 процентни поени во однос на 2015 година. Финска е лидер и на ова поле, со 60 отсто учество на жени во владата, додека Унгарија нема ниту една жена министер.