Американските разузнавачки служби проценуваат дека Иран и понатаму одржува контрола над државата и дека иранската влада не е во непосредна опасност од колапс – и покрај речиси две недели американско-израелско бомбардирање, според три извори запознаени со ситуацијата.

Проценката покажува дека иранското раководство останува кохерентно, а режимот го одржува јавниот ред и покрај смртта на врховниот водач Али Хаменеи и десетици виши функционери, вклучувајќи и команданти на Иранската револуционерна гарда.

Според американските разузнавачки оценки, Иранската револуционерна гарда и привремените лидери го задржале авторитетот над земјата. Курдските милиции во соседниот Ирак побарале координација со САД за потенцијални операции против иранските сили, но разузнавачките извештаи нотираат дека тие групи немаат “доволна огнена моќ” и бројност за сериозно загрозување на иранските безбедносни сили.

Курдските фракции неодамна побарале воена поддршка, вклучувајќи оружје и оклопни возила, но претседателот Трамп ја отфрли можноста за директна интервенција во Иран.