Петер Маѓар уште не стапил на функција, а веќе фрла бомби. На прес-конференцијата по изборната победа тврдеше дека Виктор Орбан пратил илјадници мигранти кон словачката граница за да му помогне на Роберт Фицо да победи на изборите во 2023 година.

„За разлика од Орбан, ние нема да пуштиме 2.200 осудени шверцери на луѓе од унгарските затвори. Нема да транспортираме мигранти до словачката граница само затоа што тоа му одговара на нашиот социјалистички пријател во Словачка за време на изборна кампања,” кажа Маѓар.

Бранови на граница што никогаш претходно не постоеле

Фактите се неспорни: неколку недели пред словачките избори во 2023, Словачка забележа ненадеен бран на мигранти од Унгарија – на делови од границата каде такви текови претходно не постоеле. Миграцијата стана централна изборна тема, а Фицо максимално ја искористи. Веднаш по изборите, притисокот на границата рапидно престана.

Политичкиот аналитичар Радослав Штефанчик запраша дали само строгото управување со границата може да го објасни таквиот нагол пад: „Министерот за внатрешни работи не е Хари Потер.”

Опозицијата обвинува, Фицо молчи

Словачката опозициска партија Демократи отворено обвини: „Ако е точно дека Фицо свесно помогнал да се создаде мигрантска криза, тоа претставува цинична злоупотреба на безбедносните прашања за манипулација.” КДХ бара парламентарна истрага, а движењето Хнутие Словенско поднесе кривична пријава.

Фицо сеуште молчи. Неговиот министер за надворешни работи го отфрли тврдењето како „апсурдно,” а потпретседателот на парламентот рече дека за тоа „треба добро чувство за хумор.”

Маѓар не бил надворешен набљудувач – бил дел од системот на Орбан. Ако знае, знае од прва рака. А ако го кажува јавно, очигледно смета дека му е поголем плусот отколку ризикот. Балканот знае: кога новиот шеф почнува со обвиненија кон претходникот, тоа е или правда, или позиционирање. Најчесто – и двете.