Румен Радев го направи она што Бојко Борисов не успеа да го спречи – го зеде парламентот со 44,48% од гласовите. Неговата коалиција „Прогресивна Бугарија” однесе убедлива победа на вонредните парламентарни избори, оставајќи ги зад себе и „Продолжување на промените – Демократска Бугарија” со 14% и ГЕРБ-СДС на Борисов со скромни 13,1%.

Брисел реагира со познатата мешавина на загриженост и немоќ. Аналитичарите веднаш го извадија етикетата „нов Орбан” – истата што ја лепат на секој источноевропски лидер кој не клекнува на прв повик. Радев се залага за зачувување на енергетските врски со Русија преку „Турски тек”, се заканува со вето на санкции против рускиот нуклеарен сектор и не брза со усвојување на еврото. Доволно причини Брисел да го стави на листата на „проблематични”.

А што значи ова за Македонија?

Директно и конкретно: бугарското вето останува. Радев инсистира на уставни реформи и признавање на бугарско малцинство како услов за европска интеграција на Македонија. Со оваа победа, „бугарската блокада” не само што останува – туку добива и свеж демократски легитимитет. Кој во Скопје сè уште верува дека патот кон ЕУ минува низ Софија без сериозни отстапки?

Радев не е случаен играч. Поранешен генерал-мајор и командант на бугарското воено воздухопловство, обучуван на американската база Максвел, а лично пилотирал советски МиГ-ови на воздухопловни демонстрации. Прв пат избран за претседател во 2016 со поддршка на социјалистите, реизбран во 2021. Човек кој знае и за источниот и за западниот блок – и очигледно нема намера да избира само еден.