Автопатот Прилеп-Битола е заглавен – не поради лош терен, не поради недостаток на пари, туку поради десетина газди со нелегално изградени вили и базени кај Орееец, кои не дозволуваат пристап до потребниот каменолом. Тоа тврди вицепремиерот и министер за транспорт Александар Николоски, а штетата за државниот буџет расте со секој изгубен ден.

Состојбата е поедноставна отколку што изгледа: за да се гради автопат, треба камен. За камен, треба пристап до каменолом. Сопствениците на нелегалните објекти во близина го блокираат тој пристап. Резултатот – државата мора да купува материјали од приватни каменоломи по повисоки цени и со скапи транспортни трошоци. По проценките на Николоски, штетата може да достигне и 100 милиони евра.

„Имаме само една пречка. Тоа се десетина сопственици на нелегално изградени вили и хациенди со базени во Прилепско”, изјави Николоски. Зад блокадата, според него, можеби стојат и „нејасни агенди” – деловни, политички или комбинирани.

Интересно е прашањето: зошто нелегалните градби сé уште стојат? Ако се нелегални, постапката за рушење е јасна. Ако државата може да вложи милијарди во инфраструктура, може ли да спроведе и основен инспекциски надзор? Или „буџованите” знаат дека нивните хациенди се понедопирливи од автопатска траса?

Додека одговорите чекаат, автопатот чека исто така – а со него и патниците, превозниците и економијата на целиот регион.