Franca po shkrihet, dhe kjo fjalë për fjalë. 35 rajone janë nën alarm të kuq - niveli më i lartë i paralajmërimit - dhe vapa godet rreth tri të katërtat e popullsisë. Temperaturat ngjiten deri në 41 gradë, trenat anulohen, shkollat mbyllen, dhe në vendin e verës ndalohet madje edhe alkooli.

Pikërisht ai ndalim flet më shumë për seriozitetin. Gjatë festivalit tradicional të muzikës "Fête de la Musique", që vitin e kaluar mblodhi rreth dy milionë njerëz vetëm në Paris, autoritetet urdhëruan të mos shërbehet alkool në ngjarjet shtetërore. Arsyeja është praktike, jo morale: "për të lehtësuar shërbimet urgjente e shëndetësore, që personeli mjekësor të fokusohet te më të cenuarit", njoftuan autoritetet. Kur një shtet ta heq pijen në festivalin më të madh të verës, e di që po bëhet serioze.

Parqet dhe kopshtet në Paris mbeten të hapura tërë natën që njerëzit të gjejnë pak freskim, ndërsa meteorologët pranojnë se nuk e dinë sa do të zgjasë vala e të nxehtit. Pasiguria është thuajse më e keqe se vetë vapa - nuk mund të përgatitesh për diçka, fundin e së cilës askush nuk e sheh.

Dhe ndërsa Franca shpall gjendje të jashtëzakonshme për 41 gradë, në Ballkan një verë me temperatura të tilla po bëhet ngadalë normalitet për të cilin askush nuk shpall asgjë. Te ne nuk ka alarme të kuqe, nuk ka parqe të hapura natën, nuk ka ndalim alkooli - ka vetëm këshilla të pihet ujë e të shmanget dielli në mesditë. Pyetja nuk është nëse do të na arrijë edhe ne ajo vapë, por nëse jemi fare të përgatitur për të, kur edhe Franca, me gjithë burimet e veta, mezi merr frymë.