Një avion luftarak hungarez „Gripen“ ra të hënën në mëngjes në afërsi të Sollnokut. Piloti arriti të katapultohet dhe është gjallë. Shkaku, deri tani, është i panjohur.

Kryeministri Peter Magjar konfirmoi se incidenti ndodhi, pa përmendur shkakun. Ministri i Mbrojtjes, Romulus Rusin-Sendi, kumtoi se piloti u dërgua me ambulancë në spital dhe se nuk ka të lënduar të tjerë.

Një detaj nga raportet ia vlen të nxirret nga kronologjia e thatë. Piloti arriti ta drejtojë avionin që të bjerë në terren ushtarak, me çka rreziku për civilët dhe objektet përreth u zvogëlua. Kjo do të thotë se në sekondat para katapultimit dikush në kabinë bënte llogari se ku guxojnë të bien disa tonë metal. Kjo nuk është fat. Kjo është trajnim.

Katërmbëdhjetë avionë për një shtet

Hungaria disponon 14 avionë „Gripen“ të stacionuar në bazën Keçkemet. „Saab JAS 39C/D“ suedezë përdoren për mbrojtjen e hapësirës ajrore dhe për operacione në kuadër të NATO-s, përfshirë misionet për mbrojtjen e hapësirës ajrore baltike.

Me 14 avionë në gjithë flotën, një i humbur nuk është statistikë. Është pjesë e dukshme e aftësisë së një shteti për ta mbrojtur qiellin e vet, e avulluar për një mëngjes - dhe atë në momentin kur gjithë Evropa flet për zgjerimin e konflikteve, e jo për qetësimin e tyre.

Shtet fqinj, e njëjta klasë avionësh që blihen në gjithë rajonin, i njëjti lloj qielli mbi ne të gjithë. Nga Sollnoku deri në Shkup ka më pak kilometra sesa nga Sollnoku deri në Bruksel, ku shkruhen strategjitë e mbrojtjes.