Ndonjëherë urrejtja udhëton me gliser. Në ishullin Hvar, policia kroate parandaloi një sulm të planifikuar të një grupi tifozësh ndaj dy punëtorëve sezonalë serbë të vendosur në një hotel. Cak nuk ishin tifozë rivalë, as kishte ndonjë incident në terren - por dy njerëz që kishin ardhur të punonin verën në një vend të huaj.

Detajet zbulojnë sa e organizuar ishte synimi. Patrullat policore të enjten pasdite vunë re dy automjete me 14 veta afër hotelit. Gjatë kontrollit gjetën shkopinj druri dhe teleskopikë e maska të zeza, të fshehura nën xhaketa e peshqirë, në dyshemetë dhe bagazhet e automjeteve. Dymbëdhjetë prej tyre kishin ardhur me gliserë nga Trogiri dhe Kashteli në një pikë të izoluar ankorimi, ku i prisnin edhe dy të tjerë me automjete.

Të gjithë 14 të arrestuarit janë shtetas kroatë, të lindur mes viteve 1993 dhe 2008 - që do të thotë se mes tyre kishte edhe adoleshentë. Katër, të moshës 18 deri 33 vjeç, u ndaluan me kallëzim penal për marrëveshje për sulm. Motivi? Që të dy punëtorët janë nga Serbia. Asgjë më shumë se kaq.

Kjo është një rrëfim që Ballkani e kupton shumë mirë. Urrejtje e paketuar në ngjyra tifozësh, e drejtuar jo ndaj dikujt që „bëri diçka“, por ndaj dikujt që është „prej andej“. Dy njerëz erdhën të lajnë enë ose të shërbejnë kafe, dhe gati u rrahën me shkopinj vetëm për shkak të një pasaporte. Sa herë do të bëjmë sikur këto janë „incidente“, kur modeli është gjithmonë i njëjti - dhe kur viktima është gjithmonë ai që punon më rëndë e mbrohet më pak?