Британија смени уште еден премиер, а бројачот оди сè побрзо. Ако точно се брои, ова е седмиот шеф на владата на Островот од 2016 година наваму. Земја што сака да важи за столб на стабилноста, а менува премиери речиси како што менува сезони.

Според изворите, Енди Бернам (56) е официјално именуван за премиер на Обединетото Кралство, откако кралот Чарлс III го повикал во Бакингемската палата да состави нова влада. Тој го наследува Кир Стармер, кој си замина од Даунинг Стрит со зборовите дека неговата работа е завршена и дека Британија останува посилна и поправедна отколку што ја затекнал.

Бернам не е новајлија во политиката. Порано бил министер за здравство и министер за култура во претходни лабуристички влади, а од 2017 година е градоначалник на Големиот Манчестер. Таму си заработи прекар што ретко се лепи на политичар, Кралот на северот, токму затоа што често се спротивставуваше на централната власт во Лондон и бараше повеќе пари и надлежности за северот на Англија.

Сега тој ветува десетгодишен план за преструктурирање на Британија и итни мерки за граѓаните што се борат со високите трошоци за живот. Ветува и децентрализација, односно повеќе моќ да се спушти од Лондон кон локалните власти.

Звучи познато, нели? Секој нов премиер доаѓа со план за десет години, а речиси никој не останува толку долго за да го спроведе. Прашањето за Бернам не е дали има идеја, туку дали воопшто ќе има време. На Островот во последно време мандатите се кратки, а трпението на гласачите уште пократко.