ДУИ обвинува за нов скандал во МЕПСО. Тендер од 236.000 евра за чистење на коридорите под далноводите доделен на компанија формирана само неколку недели пред распишувањето на тендерот. Без работна историја. Без референции. Со јасна партиска позадина.

Компанијата се вика „Green Maintenance“. Според ДУИ, поврзана е со активисти на коалицијата ВЛЕН. Еден од сопствениците – Шабан Шефки – јавно поддржува ВЛЕН и Изет Меџити. Договорот го потпишува директорот на МЕПСО, Бурим Латифи – близок роднина на Меџити. Семеен поддоговор, директна линија.

Ако обвинувањата се точни, тоа е модел кој го гледавме премногу пати: државна компанија, фрма формирана наменски, тендер скрипуван за победник, потписи од лица со семејни врски. Парите се државни. Победникот е партиски. Корупцијата е „технички во рамки на правилата”.

Од ВЛЕН одговорија: „ДУИ лаже, најевтината понуда ја претставува како корупција, бидејќи им се прекинаа старите канали за крадење пари во МЕПСО.” Превод од политички на човечки јазик: „Двете партии се обвинуваат на исто, бидејќи двете го прават истото.” Ова е стандарден повторувачки потег во македонската политика – кога ДУИ е надвор од влада, обвинува за корупција. Кога беше во влада, го правеше истото.

Поинтересно е она што го дополнува ДУИ – претходниот договор со компанија од Бања Лука за далноводот кон Албанија, каде партијата тврди дека има голема финансиска штета. Ако обата случаи се поврзани со ист механизам, тоа значи дека МЕПСО последниве години станува „кеш машина” за партиските активисти – без огледа кој е на власт.

ДУИ бара реакција од Државната комисија за спречување корупција, Јавното обвинителство и Државниот завод за ревизија. Историски, кога такви обвинувања доаѓаат од опозицијата, овие институции реагираат бавно или воопшто не. Што ќе направат сега – не е сигурно. Но граѓаните плаќаат: 236.000 евра не се пари кои паѓаат од воздух. Тие се од струјата што секој ја плаќа на крајот на месецот.

Прашањето кое не се поставува: кога ќе има политичка воља да се направи независна ревизија на сите тендери на МЕПСО од последните пет години? Тогаш ќе видиме колку е „Green Maintenance” единствен случај, и колку е дел од систем кој не зависи од партијата на власт.