КЗК казни четири големи маркети и Сојузот на стопански комори за забранет договор – нарушена конкуренција среде ценовна криза

Комисијата за заштита на конкуренцијата (КЗК) изрече прекршочни казни на четири големи малопродажни синџири и на Сојузот на стопански комори (ССК), поради утврдено учество во забранет договор и усогласено делување на пазарот. Одлуката доаѓа девет и пол месеци по првичните наоди на Антимонополската комисија дека трговските компании, со посредство на ССК, се согласиле заеднички да ги одбиваат новите и зголемени ценовници што дистрибутерите ги доставувале.

Настаните датираат од февруари 2025 година, период обележан со драматични поскапувања на храната и интервенции од Владата за ограничување на цените. Иако тогаш се најавуваа значително повисоки санкции, КЗК сега изрече казни кои дел од јавноста ги оценува како симболични, особено имајќи предвид дека станува збор за некои од најголемите трговски компании во државата.

КЗК објави дека секој од четирите ланци – „Веро“, „Тинекс“, „КАМ“ и „Рептил“ – ќе плати по 3 милиони денари (приближно 50 илјади евра), додека ССК, во улога на координатор на процесот, ќе треба да уплати 1,14 милиони денари (околу 18 илјади евра).

Според Комисијата, на состанокот од 5 февруари учесниците донеле заедничка одлука да не ги прифаќаат новите ценовни листи од производителите и дистрибутерите. Со тоа се нарушила основната логика на пазарната конкуренција – наместо секој трговец самостојно да ја води политиката на набавни цени, била воспоставена координирана стратегија, што се смета за т.н. „by object“ ограничување на конкуренцијата. Овој вид договори се забранети сами по себе, без потреба да се докажуваат директни последици.

КЗК повторува дека ваквите усогласени практики сериозно го нарушуваат пазарниот баланс, го ограничуваат изборот и на крај се одразуваат врз потрошувачите преку повисоки цени и недостиг на реална конкуренција.