Рускиот министер за надворешни работи Сергеј Лавров тврди дека Брисел бара од Србија да испрати војска против Русија. Не индиректно, не дипломатски – директно да влезе во вооружени формации против Москва. Барем така го претставува Лавров.

„Србија се наоѓа на прва линија во борбата за национален суверенитет додека трпи директен притисок од брисел­ските бирократи да усвои антируски политики, вклучително испраќање војници во формации што се создаваат против нашата земја”, изјави Лавров на Парламентарното собрание на Организацијата на Договорот за колективна безбедност.

Колку од ова е реалност, а колку руска наративна рамка? Брисел навистина врши притисок врз Србија за усогласување со санкциите, тоа не е тајна. Но „испраќање војска против Русија” е формулација која одговара повеќе на московската пропаганда отколку на она што ЕУ реално бара. Лавров знае дека секоја реченица за Србија има публика на целиот Балкан – вклучително и кај нас.

Рускиот дипломат исто така предупреди дека западните сили би можеле да формираат нов воен блок со Украина како алтернатива на НАТО. Дали станува збор за реална стратегија или за уште еден обид да се поттикне страв кај земјите кои лавираат меѓу Исток и Запад? На Балканот, секоја изјава од Москва или Брисел се чита двојно – еднаш за она што е кажано, и еднаш за она што се крие зад зборовите.