Во Охрид, на Меѓународниот ден на старите лица, официјално беше отворен Дневен центар за стари лица со активно стареење. Простор за дружење, рекреација и едукативни активности, а пред сè место каде што повозрасните сограѓани нема да ги минуваат деновите сами.

Проектот го реализираат Општина Охрид, Светската банка и Министерството за социјална политика, демографија и млади, а носител е Здружението на граѓани ВОПС. Светската банка и Министерството обезбедиле 1.250.919 денари, а Општината учествува со 438.000 денари. Просторот е на Општината, која ги плаќа и месечните комунални сметки, а за превоз на корисниците е обезбедено комбе 8+1.

Центарот има соба за дневен престој, кујна, простории за рекреација и за стручни тимови и три тоалети. Работи од 8 до 16 часот, а моментно го посетуваат триесеттина корисници. Предвидени се активности за физичка и ментална активност, учество во животот на заедницата и дружење меѓу генерациите.

„Ветеното станува реалност“, рече градоначалникот Кирил Пецаков, кој додаде дека центарот го гледа како место „не за стари, туку за повозрасни лица“.

Парите не се големи, а потребата е реална. Прашањето е она што секогаш доаѓа по пресечената лента: кога проектните пари ќе се потрошат, кој ќе ги плаќа луѓето и активностите во центарот? Триесет корисници е добар почеток. Колку повозрасни Охриѓани имаат потреба од вакво место, и дали воопшто знаат дека постои?