Најздравиот начин да зготвите риба ова лето не бара ниту капка масло – бара само сол, многу сол. Ораде во кора од сол е техника стара колку и медитеранската кујна, а резултатот е риба што е сочна одвнатре, нежна и со чист вкус што не го прекрива ништо.

Потребно ви е: една поголема ораде (или две помали порции), 2 килограми крупна морска сол, две јајца, мешани ароматични тревки и кора од лимон. Кога ја купувате рибата, замолете го продавачот да ги остави крлушките и да ја исчисти внатрешноста преку шкргите – таа кора од крлушки ја штити рибата од солта.

Прво загрејте ја рерната на 200 степени, со грејач горе и долу. Во голема чинија ставете ја солта, додадете ги само белките од јајцата (жолчките зачувајте ги за друго), па внесете ги тревките и кората од лимон. Измешајте сè со раце додека не се поврзе – белката прави солта да се лепи и да формира тврда кора.

На плех ставете слој сол како подлога, положете ја рибата и прекријте ја целосно со останатата смеса, притискајќи добро. Печете 30 минути за риба тешка околу килограм. Рибата е готова кога окото ќе стане сосема бело и непроѕирно. Извадете ја кората веднаш по печењето – ако остане, рибата продолжува да се готви и пресушува.

Триковите се едноставни: навлажнете ја солта со белка за подобро да се фати, притиснете цврсто кога ја покривате рибата, и не се плашете од количината сол – таа не навлегува внатре, само создава печка во која рибата се готви во сопствена пареа. Послужете со малку лимон или лесен сос. Поедноставно, а поздраво од ова – тешко.