Илјадници луѓе секое утро го гледаат бројот на екранот и врз него го градат денот. Спиел си лошо – значи денес полека. Спиел си одлично – значи можеш повеќе. Нова групна тужба во Сан Франциско тврди дека тој број кај едниот од најскапите уреди на пазарот е поблиску до фрлање паричка отколку до мерење.

Адвокатската фирма Clarkson Law Firm поднесе предлог за групна тужба против Oura, производителот на паметните прстени, тврдејќи дека уредите не можат да измерат ниту еден од физиолошките сигнали потребни за да се процени квалитетот на спиењето или да се определат фазите на сон. Наместо тоа, според тужбата, се потпираат на проценки од вештачка интелигенција што имаат, како што пишува во поднесокот, „шанса како кај фрлање паричка да бидат точни“.

Клучната реченица во тужбата е поедноставна од целата техничка расправа околу неа: „спиењето се случува во мозокот, не на прстот.“

Што фирмата рекламирала

Прстените се продаваат по цена од 300 долари нагоре. Според тужбата, Oura ги рекламирала како „изградени за точност“ и со „ненадмината точност“, тврдејќи дека нејзините уреди можат да го видат она што го гледа болничка лабораторија за спиење, вклучувајќи ги и четирите различни фази на сон. Во еден период фирмата тврдела за точност од 79 проценти, а поновите тврдења се качиле на 95 проценти за определување фази на сон во споредба со клинички лаборатории.

Проблемот, тврдат тужителите, е што вистинското определување на фазите на сон бара електроди на скалпот и сензори на очите – опрема што постои во клиника, не на рака.

„Кога луѓето се потпираат на уред за да носат одлуки за своето здравје, дезинформацијата не смее да се толерира“, изјави Рајан Кларксон, ко-основач и управувачки партнер на адвокатската фирма. „Луѓето си го распоредуваат денот, го толкуваат начинот на кој се чувствуваат и си го обликуваат животот околу неточни бројки.“

Oura одговори остро. Според изјава на фирмата, прстенот ги проценува фазите на сон преку повеќе физиолошки сигнали – срцев ритам, варијабилност на срцевиот ритам, движење, шеми на дишење и температура – а постојат рецензирани независни научни докази дека фазите на сон се поврзани со мерливи и повторливи промени во физиологијата. Фирмата признава дека прстенот не е медицински уред и не заменува клиничко испитување, но тврди дека нејзиното определување на фазите е валидирано и споредено поволно со полисомнографија, златниот стандард во оваа област. Наводите ги оспорува и најавува дека ќе се брани.

Тужбата не падна од небо. Со години корисници на интернет се жалат на истото – дека се разбудиле уморни, а уредот им кажал дека спиеле оптимално, или обратно. Она што досега беше жалба во коментари, сега е поднесок пред суд, а бара забрана Oura да продолжи со ваквите тврдења и надомест за купувачите.

Она што овој случај го отвора е поголемо од еден прстен. Целата категорија на носливи уреди – часовници, нараквици, прстени – продава прецизност како главен аргумент, а работи со проценка. Разликата меѓу „ова го мери твојот сон“ и „ова претпоставува како си спиел врз основа на пулс и движење“ е разлика во маркетинг, а не во технологија. Судот сега ќе одлучи каде поминува линијата.