Понекогаш иднината се спотнува на нешто сосема просто – кваката од врата. Американскиот регулатор за безбедност во сообраќајот (NHTSA) објави дека ќе размисли за нови правила кои ќе бараат од сите производители на автомобили да гарантираат дека патниците можат безбедно да излезат од возилото. Поводот се низа несреќи, меѓу нив и смртни, во кои луѓето останале заглавени во автомобили со рамни, електронски кваки – токму таквите што ги носат возилата на Tesla.

Одлуката дојде како одговор на барање да се отвори истрага за дизајнот на механичкото отворање во случај на итност кај моделот Tesla Model 3 од 2022 година. Регулаторот одби да ја отвори истрагата онака како што бараа подносителите, но рече дека проблемот е подобро да се реши преку нови правила отколку преку истрага за конкретен дефект. Ако таквите правила навистина се донесат, ќе важат за сите производители, не само за Tesla.

Проблемот е конкретен и застрашувачки едноставен. Возилата на Tesla имаат и рачно отворање, но само од внатрешната страна. При првичниот преглед, инспекторите откриле дека електронските кваки може да не работат ако бравите не добиваат доволно напон од батеријата на возилото. Преведено: ако струјата падне по судар, вратата што треба да те спаси може да остане заклучена. Помалку од година пред ова, регулаторот веќе беше отворил истрага откако доби девет пријави од сопственици кои не можеле да влезат во своите автомобили – понекогаш со деца заклучени внатре.

Индустријата тивко признава дека знае. Дизајнерот на Tesla, Франц фон Холцхаузен, лани изјави дека компанијата работи на редизајн на кваките. Rivian пак најави дека ја менува внатрешната квака на својот модел R2, за рачното отворање да биде на повидливо место. Значи проблемот не е тајна ниту за самите фирми – едноставно, дизајнот што изгледа футуристички и мазен беше поважен од дизајнот што отвора врата кога ќе снема струја.

И тука е поуката што излегува подалеку од една марка автомобили. Со години индустријата ги продаваше рамните кваки како симбол на модерност – без рачки, без копчиња, сè на допир. А сега испаѓа дека нешто што човештвото го реши пред еден век, обичната механичка рачка што секое дете знае да ја повлече, се вратило како прашање на живот и смрт. Колку пати технологијата ќе мора да ја „измисли” безбедноста што веќе ја имавме?