TikTok одамна не е само апликација за кратки видеа. Полека, функција по функција, кинеско-американската платформа се претвора во она што во технолошкиот жаргон се вика „супер-апликација” – едно место каде корисникот не само што гледа видеа, туку купува, плаќа, резервира хотел и игра игри, без воопшто да излезе од апликацијата.

Моделот не е нов. Во Кина веќе постои со години преку WeChat – апликација која е истовремено и социјална мрежа, и платежен систем, и продавница, и сè помеѓу. Прашањето што го следат сите е едноставно: може ли тој модел да функционира надвор од Кина, во пазари кои се навикнати на одделни апликации за секоја потреба? TikTok очигледно мисли дека вреди да се обиде.

Најголемиот скок беше TikTok Shop. Лансиран во САД во 2023 година, делот за купување веќе се натпреварува со Amazon и Shein – продажбата во САД скокна за 407 проценти во 2024 и уште 108 проценти во 2025, достигнувајќи 15,82 милијарди долари. Тоа е речиси петтина од целата „социјална трговија” во САД, со проекција дека ќе помине четвртина до 2027. Бројки кои веќе не се игра.

Но амбицијата оди подалеку од продажба. Овој месец платформата лансираше TikTok GO – резервација на хотели и атракции директно во апликацијата, што ја става во директна конкуренција со Google Search и Google Maps. Истовремено, во Бразил TikTok аплицираше за две финансиски лиценци: една за чување средства и плаќања, друга за директно кредитирање. Кога една видео-апликација сака да позајмува пари, јасно е дека повеќе не зборуваме за забава.

Не сè им успеа. Стриминг-сервисот TikTok Music, лансиран во 2023, беше згаснат само година подоцна – компанијата процени дека е попаметно да партнерира со Spotify и Apple Music отколку да се бори со нив. Но останатото остана: пребарување, мапи, мини-драми во епизоди од по една минута, казуални игри. Секоја од овие функции има една иста цел – корисникот да остане во апликацијата подолго, и да троши таму.

Прашањето за нас на Балканот е дали и кога овие функции ќе стигнат до овдешните пазари. Засега експериментите се концентрирани во САД и Бразил. Но историјата на технолошките платформи покажува едно: она што денес е тест во една земја, утре е стандард насекаде. И кога ќе стигне, навиката веќе ќе биде создадена.