Компанијата xAI на Илон Маск загуби 6,4 милијарди долари од оперативни активности на приход од само 3,2 милијарди долари во 2025-та, според документите за IPO што SpaceX ги поднесе. И загубите ќе растат – SpaceX планира Grok да го скалира на „повеќе трилиони параметри”, што бара значителен дополнителен компјутерски капацитет што чини многу.

Маск ги спои xAI – која претходно ја имаше купено платформата X (поранешен Twitter) – со ракетата и сателитската компанија SpaceX во февруари, пред да најави дека ќе ја изнесе на берза годинава. Додека OpenAI и Anthropic исто така се подготвуваат за јавни дебитантски настапи во 2026-та, IPO на SpaceX се очекува да биде една од најголемите во историјата со потенцијална проценета вредност од 1,75 трилиони долари.

Ова е првиот пат што јавноста добива поглед во финансиите на xAI и X. Во 2024-та, xAI забележа загуба од 1,56 милијарди долари на приход од 2,62 милијарди долари. До 2025-та, загубите се зголемија на 6,4 милијарди на приход од 3,2 милијарди – јазот меѓу заработката и трошењето се проширува, не се намалува. За споредба, конкурентот (и клиент) Anthropic очекува скок од 130 проценти во приходите до 10,9 милијарди долари во второто тримесечје, што ќе ја одведе до прв оперативен профит.

Капиталните расходи на AI сегментот скокнаа од 12,7 милијарди долари во цела 2025-та на 7,7 милијарди само во првото тримесечје на 2026-та. Тоа е годишна стапка од околу 30,8 милијарди долари – повеќе од двојно од минатогодишниот темпо. Дотогаш, инвестицијата донесе ограничен број корисници: 117 милиони месечни активни корисници (MAU) за функциите на Grok, од вкупно 550 милиони MAU за Grok и X заедно. Само еден од пет корисници во екосистемот навистина го користи Grok.

Сепак, SpaceX оди понапред со Grok. Дата центрите Colossus и Colossus II – кои беа активирани за 122 и 91 ден соодветно – заедно обезбедуваат околу 1 гигават компјутерска моќ. Маск ветува уште поамбициозна идеја: тренирање и инференција на орбитални дата центри, кои според него ќе бидат многу поевтини од оние на Земјата. Документот вели дека SpaceX планира да започне со пуштање на сателитите за AI пресметки најрано во 2028-та.

„Иднината на AI ќе биде определена од контролата на физичкиот стек”, гласи документот. Прашањето на кое инвеститорите ќе мораат сами да си одговорат пред да го купат IPO е едноставно: колку долго може еден ентитет да губи 6 милијарди долари годишно пред финансиите да се изедначат со амбициите.