Кремот за сончање го мажеме на плажа и мислиме дека сме завршиле. Дерматолозите велат дека токму таа логика нè чини најмногу – најголемите грешки со заштитата од сонце ги правиме токму кога мислиме дека не ни треба.

Првата грешка е дека прескокнуваме заштита кога сме во затворен простор. Стаклото блокира поголем дел од UVB зраците што предизвикуваат изгореници – но го пропушта UVA зрачењето, кое го оштетува колагенот и ја старее кожата. „И покрај тоа што сме внатре, остануваме изложени на зрачење”, објаснува дерматологот Хавиер Педрас. Истото важи и за облачни денови: облаците само делумно го ублажуваат сонцето и даваат лажно чувство на сигурност.

Втората честа заблуда е дека SPF-кремот со боја е доволен сам по себе. Кога ќе се нанесе во доволна количина (правилото на „два прста”), обоените формули даваат неприроден изглед, па луѓето ставаат премалку. Препораката е да се комбинираат – обичен крем за заштита, плус обоениот одозгора. Железниот оксид во обоените кремови дополнително штити од темни дамки.

Третата е најбаналната: не повторуваме нанесување. Експертите советуваат крем на секои два часа. И последното – заштитата не е сезонска работа. „Дури и кога си потемнет, клетките се оштетени”, вели дерматологот Кристина Гарсија Милан. Поентата не е да нè исплашат од сонцето, туку да сфатиме дека штетата е кумулативна – се собира тивко, ден по ден, без да боли, додека еден ден не се види на лицето.