Претседателката Гордана Сиљановска-Давкова во интервју за телевизија „Канал 5“ ја даде оценката дека државата се движи во добра насока и дека во многу области е пофункционална отколку пред две години. Потоа ја кажа и другата половина – онаа што вреди повеќе.

„Нашата најголема болка беа и останаа корупцијата и криминалот. Тоа е факт. Партизацијата и политизацијата сè уште се силни. Каде што има партизација и политизација, лесно успева корупција и криминал. Нам ни требаат силни институции и слаби поединци бидејќи институционално треба да се решаваат проблемите.“

Силни институции и слаби поединци. Ако постои една реченица која го опишува сето што недостига во оваа земја, тоа е таа. И доаѓа од шефот на државата, не од опозициска клупа.

Една изборна единица

Претседателката оцени дека моделот со една изборна единица е добро решение, истакнувајќи дека секој глас треба да има еднаква вредност без разлика од кој дел на државата доаѓа. „Гласот треба да има иста тежина. Не е добро во различни изборни единици со различен број гласови да се доаѓа до мандат“, изјави таа, признавајќи дека моделот не е широко распространет, но може успешно да се примени и кај нас.

Барањето за една изборна единица е долгогодишно барање на помалите партии – што само по себе кажува кому му одговара сегашниот модел.

Кој со кого не се согласува околу гласањето од странство

Тука приказната се распаѓа на партиски линии. За ВМРО-ДПМНЕ, овозможувањето електронско или поштенско гласање за Македонците што живеат надвор од земјата е клучен услов во разговорите за новиот Изборен законик. СДСМ токму тој начин на гласање го посочува како спорен, предупредувајќи на можни злоупотреби и барајќи дополнителни експертски анализи. Од Левица ја критикуваа СДСМ што не присуствуваше на состанокот за усогласување на ставовите, оценувајќи дека е пропуштена можност опозицијата да настапи со заеднички предлог.

Сиљановска-Давкова потсети дека според Уставот избирачкото право произлегува од државјанството и оцени дека сегашните законски решенија содржат нелогичности, посочувајќи дека најголем дел од државите им овозможуваат на своите луѓе во странство да гласаат.

СДСМ возврати

Реакцијата на СДСМ не задоцни. Партијата ја обвини претседателката дека селективно се вклучува во дебатата и дека нејзините ставови отвораат повеќе прашања отколку што нудат одговори.

Прашањата што ѝ ги упатија се конкретни: ако се залагала за техничка влада што би обезбедила фер избори, зошто го потпишала указот за нејзино укинување, и зошто самата не предложила нов модел на техничка влада?

СДСМ ѝ забележа и молк за судските одлуки поврзани со поранешниот премиер Никола Груевски и новинарот Драган Павловиќ Латас, како и за враќањето на имотот познат како „Бела палата“ – случаи кои според партијата ја доведуваат во прашање еднаквоста пред законот.

„Наместо тоа, претседателката избра да зборува само за делови од Изборниот законик кои одговараат на ВМРО-ДПМНЕ. Тоа не е грижа за дијаспората, туку селективна политичка позиција која го штити режимот, а не интересот на граѓаните“, се наведува во соопштението.

Реченицата што сите ја прескокнаа

Во истото интервју, претседателката упати и порака до парламентарните партии: „Сите прашања треба да ги решаваат во парламентот, а не на телевизии и на прес-конференции. Треба да има политички дијалог.“

Пораката беше упатена во телевизиско интервју. Одговорот дојде преку партиско соопштение. Ниту едното, ниту другото не се случи во Собранието.

Претседателката предупреди и дека одложувањето на реформите во Изборниот законик значи пропуштање важни обврски од европската агенда, што може да има последици врз пристапот до европските фондови. Тоа е конкретна цена со конкретен рок – за разлика од дебатата, која нема ниту едното.