Дваесет и четири години му требаа на Али Ахмети за да го стави државното знаме во својата канцеларија. И на крајот, тоа не се случи од внатрешно уверување – туку по сугестија на странски амбасадори.

Лидерот на ДУИ, Али Ахмети, по 24 години од основањето на партијата, го постави државното знаме на Македонија во својот кабинет во седиштето на партијата во Мала Речица. Знамето беше забележано на фотографиите што самиот тој ги објави по средбата со австрискиот амбасадор, Мартин Памер.

Објаснувајќи го потегот, Ахмети рече дека истакнувањето на државното знаме никогаш не му претставувало проблем. „Отсекогаш сум бил за унитарна држава. Тоа беше и предлог на странските амбасадори во земјата. Ми беше предложено на средбите со нив државното знаме на државата да биде поставено во мојата канцеларија“, изјави тој.

Според Ахмети, потегот е во согласност со верувањето дека државата им припаѓа на сите граѓани и дека државните симболи мора да се почитуваат. Тешко е да се спори со таа реченица. Прашањето е зошто беа потребни 24 години и еден странски амбасадор за да се дојде до неа.

Затоа што ако државните симболи навистина отсекогаш не биле проблем, како што вели Ахмети, тогаш нивното отсуство две децении не било случајно – било порака. И фактот дека знамето се појавува токму сега, во моментот кога Ахмети зборува за евроинтеграции, Охридскиот договор и „заедничка институционална одговорност“ пред австрискиот амбасадор, кажува дека симболиката овде не е случајна туку пресметана.

Некои ќе го видат ова како чекор напред, како гест на почит кон државата во која живееш. Други ќе се запрашаат што вреди знамето поставено по нечиј совет, а не од сопствено убедување. Обете гледишта се легитимни. Но фактот останува – државното знаме на Македонија конечно стои и во канцеларијата на човекот кој со децении ги обликуваше меѓуетничките односи во земјава. По 24 години.