Шест часот наутро на кејот „Македонија”. Екипите на ЈП „Охридски Комуналец” собираат пластични шишиња, чаши, лименки и хартија по ноќните собирања на туристите во центарот на Охрид.

Работат за градот повторно да биде чист и уреден пред почетокот на новиот туристички ден. Кај Малото пристаниште, во исто време, дел од младите сè уште се таму – песна, музика, чистење и веселба во истиот кадар.

Од претпријатието посочуваат дека ваквата појава не е карактеристична само за Охрид. Речиси сите поголеми туристички центри што во летниот период организираат концерти, фестивали и масовни настани се соочуваат со истиот предизвик. И апелираат до посетителите и граѓаните да придонесат за чистотата на градот.

Апелот и корпата

Тука вреди да се биде праведен. Комуналните работници го работат својот дел беспрекорно – од шест наутро, секој ден во сезоната, за гостинот што ќе се разбуди во девет да види уреден кеј и да помисли дека ноќта била мирна.

Проблемот е што апелот кон совеста е единствената алатка што остана во употреба. А во град што во август прима повеќекратно повеќе луѓе отколку што има жители, совеста не е инфраструктура.

Колку канти за отпад има на кејот „Македонија” на секои сто метри во тек на сезоната? Колку од нив се празнат во текот на самата ноќ, а не дури наутро? Тоа се две бројки кои никогаш не се објавуваат, а токму тие ја одредуваат количината што утрото се собира од земја.

Ако корпата е полна во полноќ, шишето завршува покрај неа. Тоа не е прашање на култура – тоа е прашање на распоред за празнење. И тој распоред го пишува општината, не туристот.