Стартапот Atorie собра 9,5 милиони долари (околу 8,7 милиони евра) почетна инвестиција со ветување што индустријата на луксузот со години се преправаше дека е невозможно: производ што излегува од фабриката на големите марки, но без нивната етикета врз него. Италијанска кожна ташна за неколку стотини долари наместо неколку илјади.

Меѓу инвеститорите се a16z speedrun, Night Capital и Џереми Лиу од Lightspeed Ventures. Компанијата ја водат Редуан Рамдани и Луис Ангуло, а Рамдани инсистира дека тоа што го продаваат не се копии. „Ист материјал, иста изработка. Доаѓа од истите фабрики“, вели тој. Не сака ни етикетата брза мода: „Тоа е бавно“, појаснува.

Промената е кај фабриките, не кај купувачите

Рамдани порано ја изгради платформата Snipfeed, продадена во 2024 година. Пораснал во Франција, во семејство што работело во производството на луксузни стоки, па кога се вратил во индустријата забележал дека таа веќе не функционира како порано.

Долги години моделот беше едноставен: марка како Ralph Lauren носела свои дизајни и материјали во фабрика, а фабриката произведувала. Но марките мораа да нарачуваат во огромни количини, што водеше кон презалихи, а фабриките зависеа од шачка големи клиенти. Ако една марка се повлечеше во последен момент, ризикот паѓаше врз фабриката.

„Она што се менува е дека најдобрите фабрики сè повеќе имаат сопствени капацитети за дизајн и развој на производ“, вели Рамдани. „Наместо едноставно да произведуваат туѓи дизајни, тие можат сами да развиваат производи, брзо да ги приспособуваат и да произведуваат во помали серии.“ Со тоа фабриката повеќе не е подизведувач – таа може да оди директно кај купувачот.

Броевите

Компанијата ја заврши минатата година со околу 5 милиони долари продажба, а годинава очекува годишна стапка на приход над 55 милиони. Работи со над 40 фабрики низ светот. Целта што ја кажуваат гласно е да станат алтернатива на Zara – „многу висок квалитет за цена што е многу достапна“.

Вештачката интелигенција е тука, се разбира, бидејќи без неа никој веќе не собира пари. Ја користат за анализа на трендови, за проценка на побарувачката и за предвидување кога некој материјал ќе почне да снемува за фабриките да се снабдат навреме. На сајтот има агент што склопува облека според тоа кој или што го инспирира купувачот. Рамдани вели дека веќе гледаат раст на препораки за продажба што доаѓаат преку ChatGPT и Claude.

Приказната е привлечна и бројките се вистински. Но вреди да се запамети дека тоа што го продаваат не е нова технологија туку стар факт што дотогаш бил добро чуван: разликата меѓу цената на изработката и цената на етикетата отсекогаш била огромна. Ако една фабрика може да го произведе истото за неколку стотини, прашањето не е како Atorie успеала – туку колку долго нè чинеше тоа никој да не го каже наглас.